Concentración protesta na porta do Hospital

Os problemas do Hospital Virxe da Xunqueira de Cee semella que non son tan fáciles de solucionar. As protestas do Comité de empresa continúan malia que o xerente, Francisco Pazos, asegure que a chegada dos celadores é inminente e que ademais non depende da dirección do hospital. Un hospital que a pesar de todo segue aumenando en persoal neste o seu 10º aniversario.
De feito, o Comité, que vén solicitando a chegada dos celadores ao centro, acaba de convocar unha protesta na porta do hospital para mañá, xoves 23 de outubro ás 15:00, baixo o lema "Por unha verdadeira integración, xa" (referíndose á entrada na rede do Sergas do Hospital). Na imaxe vemos as protestas do ano pasado da sección de Enfermería.
E por que agora?, preguntaranse moitos traballadores do hospital e veciños da bisbarra. Segundo apuntan dende o Comité, a dirección está en plena campaña mediática con gallo de "tapar" as carencias do hospital, como listas de espera, postos de confianza nomeados sen coñecimento do comité, xestión económica discutible... a base de datos, que se ben son positivos en clave de crecimento do hospital, non son suficientes para os membros do comité.
Pazos resposta
O director falaba na Radio Nordés, e informaba das novas infraestruturas, como o novo paritorio. Ademais lembraba que o HVdX atópase por diante dos 7 mellores da rede sanitaria en listas de espera, e que os datos destea ano son mellores que os do ano pasado, e que cos planes de mellora que van atallar en breve agardan reducilas aínda máis.
Pazos referiuse ás revoltas do Comité, e sinalou que a dirección ten que seguir o seu camiño e que as competencias do Comité non deben chegar ata estas reivindiacións. Ademais, apuntou que cando non se quere, ver non se vé, en referencia a visión dos traballadores do comité.
Pazos asegura que o peche de ano será moi positivo, e que o hospital volverá estar entre os mellores da rede sanitaria galega.

Autor: Que pasa na costa
Elace: http://quepasanacosta.com/content/view/3282/26/